Mèchnâdje
Auteur : POURTOIS Michel èyè co d’z autes scrîjeûs
Mai 1940
Djèrôme poûrte ses solés à rsèmler au coûrdanî. Sacans djoûs après, èl guêre est dèclâréye èyè
Djèrôme est mobilisé, i monte au front, il est fét prijonî.
Libèré pa les Russes in 45, on l’invoye au Goulag pou monvéche condwite. Après ’ne dîjin.ne
d’anéyes, il est dèscandjî pa les Amèrikins, èyè pou fini, i s’èrtroufe dins ’l Wisconsin (USA) yusk’i
s’instale. Ouf !
Les anéyes passont….
Trinte ans pus târd, vèl-là qu’i rvint vîr ès vî Nivèle qu’a bin candjî dèspû tout ’s temps-là… sauf
qu’èl coûrdanerîye, lèye, est toudi là al minme place. Djèrôme èrsondje à ses solés…
Curieû, i rinte dins ’l boutike èyè dmande au vî ome qu’est là padrî ’ne soûrte dè machine à keûde :
– Il a lonmin qu’vos stez instalé doûcî ?
– Ô… ’m fi, dèspû d’djà bin avant-guêre, savè !
– È bin, adon, c’èsst´à vous qu’dj’avoûs poûrté mes solés à rfé. Ç’astoût djusse sacans djoûs avant ’l dèclarâcion d’guêre dèvant qu’djè n’seûche mobilisé… Èy’i bèrdèle toute ès n-avintur´
– Au fèt´, vos l’z avez putète co, mes solés ! Ça sâroût drole…
– Ratindez ’ne miyète, djè m’vas vîr, disst-i ’l coûrdanî, èyè tout chalant, i soûrte d’ès boutike poudaler padrî dins l’èrmîje.
– Comint-ce qu’is stine vos solés ? qu’i crîye.
– Djaunes.
– Avè des bouts cârés yè des bruns lacèts ?
– Tout djusses !
– Is sâront prèsses djeúdi !
……..
